المرايا ..

صدق يطعن ..

في نوايانا الدفينة

طعن صادق ..

يفضح الزيف وسنينه

المرايا والله العالم .. هي أصدق شي ..

في عالم كذوب

في زمن مظلم وظالم .. ماتلاقي ضي ..

ينبض بقلب الدروب

المرايا ..

عشق ساكن داخل قلوب الكثير من الصبايا

إلا نوره ..

بنت غايه في الجمال ..

حسنها ياخذك من يمناك ..

لحدود الخيال

يوم نادت أمّها وبصوت عالي :



( يمّه .. يمّه بسرعه تعالي ) ..



لمّا جتها أمّها ..

قالت : علامك ؟

نوره قالت :



يمّه أرجوك بقيامك ..

إبعدي هذي المرايه..

ابعديها ..

وإلا أقلّك ..

يمّه تكفين اكسريها ..

ما أبيها .. ما أبيها ..


ولو سألتوا ..

ليه هي قالت كذا .. وإيش العلاقه ؟

قلت شوفوا ..

ماقدر أخبّي لذا .. نورة (معاقه) !

*******

شلل نصفي ..

سرق منها طفولتها ..

سرق حتى ابتسامتها ..

تشرّب جسمها الطاهر على غفله

ولا قدّر برائتها وهي طفله

حواليها كثير أطفال ..

بنات العم .. والجيران ..

عيال الخال ..

تراقبهم .. تتابعهم

تشوف (أحمد) وهو يسحب شعر (سلمى)

و(علي) يلحق (مها) وبيده مسدس ما

و(خالد) قاعد يحاور (حسام) ..

بعلبة البيبسي

ويكسر ظهر هالمشهد ..

حزن (نوره) وهي تبكي على الكرسي

تحاول قد ماتقدر ..

لجل تخفي مدامعها

وثار الدمع واتحدر ..

وبدت رعشة باصابعها

تزم إيدينها لكن ..

يديها ماتطاوعها

****

وتكبر نوره ويكبر ..

معاها الهم

ويجري حزنها الأقشر ..

بمجرى الدم

وياصل عمرها العشرين ..

وفي هالعشرين ..

تغيّر كل شي فيها ..

ملامحها .. - مع إن الحزن ماسحها

أمانيها .. - ولو ماعاد تعنيها

سوالفها .. – بعد مالهم والفها

في هالعشرين ..

على نفس الألم تصبح ..

وعلى نفس القهر تمسي ..

على الكرسي .. !!

في هالعشرين ..

أبد ماتابعت موضه ..

ولاتعرف (جيفينشي) .. أو (كريستيان ديور)

أو (فيرساتشي) وعروضه

ولا مكياج واكسسوار ..

وحتى عطور ..

تضج .. تثور

إذا قالوا لها ..

(نوره .. شرينا لك عطر ..

شوفي بعد فستان ..

يانوره إلبسيه الحين ..

ترا بيطلع عليك جنان ..

بسرعه بس لاتبطين)

تجاوبهم :



(بسرعه ! ..

بسرعه ليه ؟

وإلا لمين ؟

وهو من كثرة العرسان ! )
تقاطعها أمها :

(نوره ..

وش تقولين !! )



ترد نوره :



(( يبه .. يمّه ..

كفاية وإسمعوني زين ..

أنا عمري ترا عشرين

ترا ما عادني طفله ..

ياناس المسأله سهله ..

مثل ما (واحد) و(واحد) يساوي (اثنين)

معاقه .. خير ! ماتفرق ..
- وفي هاللحظه ..

بدت لحية أبونوره ..

تلم الدمع من عينه ..

وبدت تغرق !-



يبه .. يمّه
أنا مليت من روحي ..

نعم مليت

تعبت أداري جروحي ..

وياما أخطيت

خطاي إني تصنّعت السعاده ..

لجل خاطركم

لجل ماتـنجرح فيكم ..

مدامعكم

يبه تدري ؟ ..

كنت أتمنى من صغري ..

وهذي أمنية عمري ..

وإلى الحين هي منوه

تمنيت احضنك بالليل ..

إلى من جيت من شغلك

أبوسك فوق راسك حيل ..

وافك الجزمه عن رجلك

أروح أجيب لك قهوه ..

واجيك اجري

وحتى إنتي يا أمّي ..

لو تدرين كم عانيت ..

كم اتمنيت ..

أخفف عنك شغل البيت

مثل ما ( نجوى) ..

تساعد مرت عمّي

يبه .. يمّه

تراني ضقت

وربي ضقت من نفسي

ياربي شقد طفشانه ..

وتبغوني بعد ألبس !!

ألبس من علشانه ؟

أبد لاتصدقون اني ..

أبتزوّج واجيب عيال
والله عال !!!

من إللي في الزمن هذا ..

بيرضى أكون له زوجه ؟؟

ويتزوّج معي كرسي !!

يبه إنسى ..

وحتى انتي دخيل الله يايمّه ..

بعد إنسي ))

وهذي سالفة نوره ..

ياهي بنت مقهوره ..

مضى من عمرها عشرين ..

وهي باقي على هالحال

حكايتها إنتهت ألحين ..

وخلّت داخلي ثوره ..

وأنا ما بيهدالي بال ..

الين اعرف من اللي بوقتنا رجال..

ويتزوّج مثل نوره ؟؟

كلمات / محمد